UVIMBE KATIKA SEHEMU ZA SIRI ZA MWANAUME (SCROTAL MASSES)

Na Archandramu Mbungu.

Uvimbe katika sehemu za siri za mwanaume unaweza kusababishwa na matatizo mengi, mfano maambukizi katika kiwanda cha kuzalishia mbegu za kiume, Ngiri au Hernia, kuvimba kwa mishipa ya damu, kujaa maji au busha, kuvimba kwa mirija ya mbegu za kiume, saratani ya korodani, maambukizi sugu ya korodani, kujinyonga kwa korodani na matatizo mengine.
JINSI MATATIZO HAYA YANAVYOTOKEA
Maambukizi katika vifuko vya kutunzia mbegu au kiwanda cha mbegu na maambukizi sugu ya njia ya mkojo au maambukizi ya tezi dume hasa endapo mwanaume atakuwa ameshawahi kuumwa ugonjwa wa kisonono au gono ambao dalili zake ni kutokwa na usaha katika njia ya mkojo.
Wengine hupatwa na tatizo hili baada ya kufanyiwa upasuaji wa kuondoa tezi dume au endapo mgonjwa atakuwa aliwekewa mrija wa mkojo kwa muda mrefu. Ugonjwa wa kifua kikuu pia huchangia tatizo hili kwa kiasi kikubwa.
Tatizo huanza ghafla, huambatana na homa na kutetemeka na maumivu makali ya korodani, ukipapasa kwa ndani ya korodani utagusa vivimbe kama goroli kwa ndani zaidi juu ya korodani. Ugonjwa unaweza tu kutulia baada ya kuanza matibabu lakini madhara yake ni kuziba kwa njia ya kupitishia mbegu hivyo kukufanya uwe mgumba.
Maambukizi ya korodani yote huwa makali na huanza ghafla au kwa kipindi kifupi, hutokea zaidi katika kipindi cha ujana na husababishwa na maambukizi mengine yoyote ya korodani. Mgonjwa hulalamika homa kwa vipindi, maumivu ya korodani na kuvimba upande ambao una maumivu.
Hali hii ikiendelea bila jitihada za haraka kuchukuliwa, korodani hiyo husinyaa na kupotea kabisa na kukufanya uwe na korodani moja, endapo tatizo litakuwa kwenye pande zote mbili, basi korodani zote mbili zinaweza kusinyaa na kupotea na kujikuta huna korodani.
Endapo korodani itajinyonga basi itakufa kwa kutokuwepo na mzunguko wa damu wa kutosha na tiba yake ni upasuaji na kuiondoa.
Mwanaume ambaye ana korodani moja, ni vema akapime mbegu za uzazi kuona kama zipo za kutosha na yule ambaye hana kabisa korodani, uwezekano wa kuzaa haupo. Saratani ya korodani huzalisha uvimbe ambao ni mgumu kwenye korodani na hauna maumivu. Kwa hiyo, endapo una uvimbe mgumu kwenye korodani na hauna maumivu, ni vema uondolewe kwa upasuaji.
Ugonjwa wa ngiri au hernia hutokana na uwepo wa uwazi toka juu tumboni hadi ndani ya mfuko wa korodani. Njia hii huwa inakuwepo unapozaliwa na kuziba taratibu kutokana na kuendelea kwa misuli.
Kama njia ya ngiri itaendelea, husababisha matumbo kuingia humo na kujaa kwenye mfuko wa korodani. Ugonjwa huu wa ngiri ni tofauti na busha. Busha ni hali ya kujaa maji katika mfuko wa korodani na husababishwa na maambukizo ya vimelea viitwavyo filaria na huenezwa na mbu.
Ugonjwa wa ngiri pia huwatokea watoto, vijana na watu wazima. Ugonjwa wa busha na ngiri hutibika kwa upasuaji. Kinga ya mabusha ni matumizi ya dawa za kinga ya mabusha na matende ambayo kila mwaka hutolewa bure na serikali kwa wananchi wote, huwa kunakuwa na kampeni maalumu.
Ugonjwa wa ngiri hutokana na kasoro katika njia zake, ili kuepuka ni kutofanya kazi ngumu kama utagundulika una tatizo hilo.
USHAURI
Matatizo haya ya korodani husababisha matatizo makubwa ya uzazi kwa mwanaume kwa hiyo ni vizuri kuwahi hospitali kama una matatizo sehemu hiyo, usipuuze hata maumivu kidogo kwani athari zake ni kubwa.
Matatizo au maambukizi katika njia ya mkojo pia ni shida kubwa kwa mwanaume. Epuka kuumia korodani, joto kali kwenye korodani, uvutaji wa sigara, bangi na matumizi mengine ya madawa ya kulevya.
Epuka ngono zembe, vyote hivi huhatarisha afya yako ya uzazi.

Kwa mawasiliano zaidi.
Piga namba 0766245554 au 0658245554
Email:mbunguarchandramu@gmail.com